Oor President Kruger Kinderhuis Pretoria

In 2023 het ’n groep lede van die gemeenskap bymekaar gekom met ’n gedeelde droom – om ’n fondsinsameling ten bate van die President Kruger Kinderhuis in Pretoria te hou. Ons het besluit ons wil iets anders en uniek aanpak… en omdat ons almal hou van braai, is die Skud Jou Vleis Braai Kompetisie 2023 gebore!

Ons het toe ons eerste suksesvolle braaikompetisie gehou en daarin geslaag om ’n wonderlike R47 000.00 in te samel. Dié fondse het ’n tasbare verskil gemaak, en ons is vasbeslote om daardie momentum voort te sit – hierdie keer met die doel om ’n nóg groter impak te maak in die lewens van die kinders by die kinderhuis.

Een van die redes waarom hierdie steun so belangrik is, is omdat die staatsubsidie eenvoudig nie tred hou met inflasie nie. Trouens, dit word jaar na jaar minder. In die 2023/24-boekjaar het die kinderhuis slegs 30% van hul jaarlikse uitgawes van die staat ontvang – wat beteken dat daar net genoeg is vir 4 van die 12 maande.

Jou bydra maak regtig ’n verskil. Dit help om die deure van die kinderhuis oop te hou, ’n hoë standaard van opvoeding en versorging te handhaaf, en ’n veilige en liefdevolle omgewing te skep waar kinders die kans kry om te droom, te groei en hul volle potensiaal te bereik.